Op Kruisbaai herhaal die geskiedenis homself en vra die dood tasbaar na siele. Dit weet Lily Reynecke egter nie toe sy Maja se voetspore daarheen volg in die hoop om haar lewe weer aanmekaargelym te kry nie.
Kort ná haar aankoms eis Springklip, die hoë krans waar reeds vier kruise staan, nog ’n lewe. Nog iemand wat gespring het. Of dalk gestamp is. Dalk deur Lily self in een van haar vergeettye? Dalk groot, beneukte Ben? Of beskerm Ben vir Kassie, sy verstandelik gestremde broer?
Gys Niemand, die bles speurder met sy boep, snor en voorliefde vir paais, ondersoek die saak teensinnig. Kruisbaai gee hom koue rillings. Wat is dit aan die plek dat dese en gene hulle so verlustig in ongeoorloofde vleeslikheid? Die visvrou, Annie Niemand, se postume wraak? Gerbrand Niemand se werkinge uit die hel? Of net die eensaamheid van ’n afgesonderde plekkie waar die maan en wind massas water hierdie kant toe stoot en daardie kant toe sleep?
Springgety is die eerste boek van vyf in die Gys Niemand-reeks.
“Chanette Paul slaag daarin om mens aan die wonder te hou, omtrent enigiemand kan die moordenaar wees, selfs die hoofkarakter. Sy hoef wat my aanbetref nie terug te staan vir Deon Meyer nie.”
– Chris van der Westhuizen
Koop die Afrikaanse eBoek hier.
